بسم الله الرحمن الرحيم
طبعا كلنا نبحث عن التجاره ونبا نستفيد
لأننا نحاول اننا نعيش حياه افضل ومستوى اجتماعي افضل لنا ولعيالنا
ولكن الله سبحانه وتعالى اعطانا العقل حتى نفكر
بصراحه في بعض المواضيع لا يستطيع العقل ان يتقبلها ومنها بيع الذهب بكميات ضخمه 
كمثال شخص يقول انا عندي 100 طن ذهب ابا ابيعه
وهالذهب موجود في بنك بالدولة
واقل عن سعر السوق العالمي ب5 % او 7 %
احب اسأله
هل شفت الذهب بعينك ؟
هل عندك اوراق مصدقه بأن الذهب موجود بالبنك وتكون ورقه اصلية ؟
هل عندك البايع مباشرة ؟
هل تعرف قيمة ال100 طن ذهب ؟
هل نعرف كم المبلغ مال الخصم ؟
هل تعرف بأن هالكمية اللي انت عارضنها ممكن انها تأثر بالاقتصاد العالمي وتدفع اسواق الذهب الى الانهيار ؟
...
بالنهايه بيطلع لي واحد وبيقول تعال عند المحامي واوقع عقد معاك يضمن حقي وحقك وانا اراويك الذهب
هالكلام الفاضي سمعته 20 الف مره وبالنهايه تلاقي عند المحامي 20 الف شخص كلهم وسطاء للذهب وتقولهم راووني اوراق الذهب اللي عندكم ويقولون والله انت وقع ونحن باجر بنراويك ولو حتى وقعت بتلاقي اعلان بالمنتدى اليوم الثاني مطلوب 100 طن ذهب
خخخخخخخخخخخ
...
هل تعتقدون اللي عنده هالكمية من الذهب بيعتمد على وسطاء لبيعه ؟؟؟
يعني هالملياردير اللي يعتبر من اغنى 10 اشخاص على مستوى العالم كونه يمتلك 100 طن ذهب مقدره قيمته بأكثر من 5 مليار ما يقدر يبيع هالذهب لربعه ؟؟؟
يعني هالملياردير مايقدر يسوي رخصة بيع وشراء وتداول الذهب ويبيعه ببورصة الذهب العالمية ويربح فيه بدل لا يعطي خصم 5 % او 7 % للمشتري ؟؟؟
...
لما سولفت مع بعض الوسطاء قالوا لي عن العمولة ولما حسبتها طلعت بالملايين والكل يراكض ويدافع عن هذا موضوع الذهب لأنه مصدقنه بالغصب طمعا بالعمولة والوسطاء بيتضاربون على العمولة قبل لا يدرون اذا الكمية موجوده ولا عباره عن سراب
واحد من الاخوان يقول عن شباب دخلوا بموضوع وساطة الذهب بالنهايه لما تجمعوا كلهم طلع البايع والمشتري نفس الشخص
خخخخخخخخ
...
لهالسبب يا جماعه قبل لا احد منكم يطرح رد يهاجم موضوعي هذا ياليت لحط لنا ورقة اصلية موقعه بختم البنك او اي جهة تثبت ملكية ووجود هذا الذهب بالدولة او رغبة الشخص في بيعها بشرط انها تكون ورقة اصلية مب صورة اللهم يخفي المعالم اللي تدل على صاحب الذهب واللي يقول انه وكيل عن مشتري او وكيل عن بائع ياليت يحط لنا صورة الوكالة مع اخفاء اسم البائع او المشتري
اذا احد منكم احس اني غلطت عليه بهالموضوع اتمنى يسامحني لأن هدفي مصلحتكم وانا وياكم مب ضدكم
تحياتي الحاره لكم
اخوكم
ابو شوق